Bo o ensaio dos nosos cadetes desprazados a Vedra

O sábado á tarde a localidade de Vedra acollía o Campionato Galego de Dúatlon na modalidade contrarreloxo por equipos, no que tomaban a saída máis de 100 equipos (Campionato Galego e Open) entre os que mobilizaban ao redor duns 585 deportistas. Pola nosa parte concursamos cun equipo masculino formado por 6 dos nosos cadetes de segundo ano (Borja Benavent, Álvaro Elizalde, Lucas Lorenzo, Samuel Nuñez, Andrés Prieto e Pablo Tran), co propósito de preparar o Campionato de España de Dúatlon nas modalidades de contrarreloxo e substitucións por equipos a disputar en Avilés os días 30 e 31 de marzo. E vaia se o fixeron, correron a 3:55 os primeiros 5.000 metros, rodaron a 30.6 qm/h os 20 quilómetros e volveron correr en 4:30 os últimos 2.500 metros, nunha distancia total de carreira moi superior a que afrontarán en Avilés (3.400m, 11 qm e 1.300m). Por equipos fomos 27º dos 32 equipos senior que tomaron a saída no Campionato Galego e só nos superaron 14 dos 56 equipos Open. Resultados que podedes consultar no apartado de descargas tríatlon desta mesma web.